கடுதாசி வந்திருக்கு

கடுதாசி வந்திருக்கு
கருப்பாயி மவளுக்கு
பிரிச்சி படிக்க நெனச்சாலும்
ஒதுங்கனதில்ல பள்ளிக்குட ஓரம்
எதை எதையோ படிக்கறன்னு
சொல்லுவாலே மவ அடிக்கடி
எப்ப வருவா புள்ள
படிச்சு சொல்ல

சமஞ்ச உடனே பரிசம்போட்ட மாமனுக்கு
ஒத்தையா பெத்து எடுத்தா
இந்த பொண்ண
பொட்டப் புள்ள பொறந்திடுச்சுன்னு
கள்ளிப்பால அவன் தேட
எப்படியோ காப்பாதிட்டா
எல்லோரையும் எதுத்துகிட்டு

பள்ளிக்கூடம் சேக்கறதுக்கு
இவ என்ன பாடுபட்டிருப்பா
அடுப்படியில வெந்தாலும்
மவள ஆளாக்கி பாக்க நெனச்சிப்புட்டா
பொட்டப்புள்ளக்கி படிப்பெதுக்குடீன்னு
புருசங்காரன் கேட்டப்ப
வீராப்பா போய் சேத்தா மவ
பெரிய படிப்பு படிக்கனுமுன்னு

ஆத்தா பேர காப்பாத்தி
நல்லா மவ படிக்கறான்னு
வாத்தியாரு வந்து சொன்னப்ப
வயிரு குளுந்து சந்தோசப்பட்டா
சந்தோசத்துல சங்கடமா
கட்டனவன் போயிட்டான் கடவுள்கிட்ட
அப்பனாவும் இவயிருந்து
காப்பாத்துரா புள்ளய

சீமைக்கு போய் படிக்கனும்முன்னு
செல்லக்குட்டிக்கு ஆசப்பட
கட்டட வேலக்கி போறா
கழினி வேல இல்லாதப்ப
சிந்தர வேர்வைக்கு கூலியா
சலிக்காம மவ படிக்கரா
வெளிச்சம் இல்லன்னு சொல்லாம
புள்ள வெளக்கு வச்சி படிக்கரா

பள்ளிக்கூடத்துல மொத வந்தான்னு
வாத்தியாரு கூட்டாரு
போனவள ஒக்காத்திவச்சி
என்னென்னமோ சொன்னாங்க
சொன்னது எதுவும் புரியாம
செலயாட்டம் தலையாட்டி
பட்டணத்துக்கு அனுப்பி வச்சா
பரிச்ச எழுத புள்ளய

எழிதிட்டு வந்த பத்து நாள்ல
வந்திருச்சி கடுதாசி
பாவி மவளும் வந்துப்புட்டா
படிச்சு சொல்லக் குடுத்தேன்
மல்லிப்பூ பூத்தமாரி
சிரிச்ச புள்ளய பாத்தப்ப
சந்தோசமான சேதிதான்னு
புரிஞ்சிருச்சி நெஞ்சிக்கு

வானத்தப்பத்தி படிக்க எழிதிட்டு வந்த
பரிச்சயில மொத வந்துட்டன்னு
கடுதாசி வந்துருக்காத்தா
வானத்தி பத்தி மட்டும் இல்ல தாயி
அத தாண்டி கூட என்ன இருக்குன்னு
படிச்சிட்டு வா போயி
ஆத்தா கழனிக்கு போய்வரேன் புள்ள
கதிரருக்க நேரமாச்சு...